„Густа плетка: вмрежување 2.0“

На 8 октомври 2025 година, во Europe House – Скопје, се одржа средбата „Густа плетка: вмрежување 2.0“, организирана од Форум за разумни политики во рамки на проектот „Застапување за инклузивен развој“, поддржан од Владата на Швајцарија преку програмата Цивика мобилитас. На средбата беше презентиран акцискиот план, кој ги обедини клучните коментари, забелешки и предлози што во изминатиот период беа споделени во директни средби со претставници на Министерството за образование и наука, Министерството за труд и социјална политика, Министерството за економија, Агенцијата за квалитет во високото образование, Агенцијата за вработување, како и со претставници на академската заедница, граѓанските организации, истражувачките центри и експертите од областа. Во претходните разговори тие ја нагласуваа потребата од почести средби, подобра координација и директна комуникација во процесот на реформи. Средбата овозможи отворен разговор за тоа што може реално да се подобри во системот на високото образование, но и создаде чувство на заедничка одговорност и подготвеност различните гледишта и надлежности да се усогласат, како неопходен чекор кон подобри промени.