Forum for Reasonable Policies

Програма за општество / демократија

Култура

Образование

“Society is a partnership of the dead, the living and the unborn”

Edmund Burke

Контекст

Република Македонија е политички крајно поделено општество. Оваа констатација е “општо место“ што го споделува безмалку секој граѓанин, секој проследувач на настаните и општествениот развој, секој претставник на меѓународната заедница и секој надворешен проследувач. Државата не покажува знаци на прогресивно демократско заздравување, после 25 години независност. Напротив, тенденциите на разградување на општественото ткиво се сеприсутни, а впечаток е дека се појавуваат нови и нови линии на разграничување.

Идеолошките парадигми се комплетно изместени, најчесто непостоечки. Етничката парадигма е присутна едноставно заради популациската константна, но и таа се чини дека станува латентна, иако секојпат лесно запаллива, под тежината на останатите општествени “тешки“ варијабли (социо-економскиот статус, политичко-партиските преференци, културните различности, различниот поглед на свет).

Република Македонија е номинално демократска држава, но постојаното разградување на институците, нарушувањето на и онака кревката и несмасно поставена уставна рамнотежа помеѓу извршната, законодавната и судската власт (checks & balances), како и клиентелистичкиот хабитус дополнително и на моменти драматично го подриваат демократскиот супстрат на државата и општеството.

Во што веруваме?/ Нашето кредо

Ова се основните претпоставки зад кои веруваме дека се крие потребата за создавање на мостови во општеството. Мостовите спојуваат, но мостовите се потсетник и за тоа дека она што е споено (двата брега) всушност е раздвоено, примарно е раздвоено а потоа спојувано. Дилемите што оправдано си ги поставува здраворазумниот граѓанин се едноставни: дали воопшто може да се спои нешто што е толку многу раздвоено, па дури и дали треба да се спои?

Ние немаме дилема: мостови во Македонија се неопходни, сега повеќе од било кога претходно, бидејќи државата има сериозен негативен потенцијал да се дезинтегрира.

Нашата приказната се потпира на
три поврзани столба:

I. – Првиот столб е фокусирањето на решенија што се ОДРЖЛИВИ (SUSTAINABILITY). Тоа е нашиот темелен, долгорочно насочен поглед на работите. Тоа е чесниот пристап што не ги загрозува идните генерации и нивното право на подобар живот. .

II. Вториот столб е следењето на ЗДРАВОРАЗУМСКИОТ ПРИСТАП (COMMON SENSE) при дизајнирањето на политиките. Ваквиот пристап обезбедува доследност во запазување на приоритетите за просперитет на граѓаните на Република Македонија.

III. Третиот столб е градењето на заедништво (COMMON GROUND) околу предложените политики.

Веруваме и се залагаме за решенија и политики кои се засноваат на разумот (здравиот разум), чија реализација обезбедува одржливост на општествениот развој во различни сфери.

Политичките/партиските позиции се важни, но на крајот остануваат ефемерни. Ние ги бараме фундаменталните принципи врз основа на кои би можеле и треба да почиваат овие политички позиции. Значи, бараме начин КАКО да се размислува за политичките и општествените појави, позиција која е многу поважна и поиздржлива од минливото изразување на секојдневна (политичка) позиција.

Дали ќе задржиме одреден идеолошки став? Идеологијата е најштетниот непријател на мислата, односно разумот. Ќе се стремиме да го изградиме нашиот кредибилитет на недогматски начин, преку задржување и зачувување на позиции кои се правилни, без да им даваме тежина или значење на последователните прикачени идеолошки етикети. Така, концептуалната рамка на Форум за разумни политики се заснова на разумна/здраворазумска позиција и содржи потенцијал за градење на заедничка основа.

Сепак, пристапот на заедничка основа и здрав разум во никој случај не претпоставува задржување на политичка/општествена позиција која е прифатлива за сите страни и за сите (политички) партии. Ваквите несоодветни политики се политички, интелектуално и морално одвратни и го заматуваат разумното размислување со барање популистички, а не здрави решенија и цврста заедничка основа.

Затоа, Форум за разумни политики ќе предложи и ќе размислува за решенија и политики за кои НИЕ веруваме дека се правилни (иако понекогаш може да се сфатат како контроверзни), а ние ги сметаме за исправни бидејќи се засноваат на принципите што ги сметаме за исправни (дури и кога тие принципи се против она што се нарекува „популарно мислење“).

Ќе ги изговориме ВИСТИНИТЕ за кои веројатно многу луѓе се свесни, но очигледно многу малку се подготвени да ги артикулираат во јавната сфера, бидејќи, во исто време, можат да се спротивстават на секојдневните политички искривувања на тие вистини.

Ќе задржиме решително непартиски став, но ќе го поддржиме и одобриме секој разумен став што доаѓа од која било страна на политичкиот спектар.

На патот на промоција и реализација на нашите предложени политики, сметаме дека унапредувањето на партиципативната политичка култура е основен предуслов, најпрво во доменот на јавниот дискурс, а потоа по сите пори на општественото ткиво.

Визија

Општество кое е демократско, но не и плебисцитарно. Општество во кое волјата на мнозинството треба да се почитува и да се води сметка при креирањето на политиките, но ова мнозинство да не биде штетно за останатите членови на општеството.

Држава која негува добри, позитивни и конструктивни односи со соседите, но и земја која е способна да ја добие и одржи својата соодветна позиција и улога во регионот и во светот. Земја која ужива економски просперитет, кој е одржлив и овозможува подобри шанси и подобар живот за секој слој од општеството. Регион кој не е оптоварен со национализам. Народи кои се способни и сакаат да градат мостови меѓу себе во сите општествени сфери.

Мисија/цели

Ќе создаваме основа за одржлив развој во меѓуетничките односи, културата и воопшто во општественото живеење.

Ќе работиме на промоција на општество кое во коренот на своето дејстување го има здравиот разум, како најквалитетна основа за градење на заедништво.

Ќе создаваме платформа за афирмација на вистински политики и принципи, без разлика дали тие (во моментот на нивното соопштување и артикулирање) се популарни.

Ќе се спротивставиме на компромиси и лажни консензуси кои нудат палијативни решенија, но кои во суштина долгорочно го продлабочуваат јазот во општеството и го загрозуваат просперитетот;

Ќе создадеме платформа за афирмација на реални, опипливи, здраворазумски политики и принципи, без разлика дали се популарни и „трендовски“ во моментот на нивното изговарање.

Ќе поддржиме личности, групации и политики кои ги одразуваат и се вклопуваат во нашите приципи;

Постојано ќе работиме на развивање на партиципативната политичката култура во општеството, како темелна вредност која создава услови за изнаоѓање на правилни политики и градење заедништво околу нив;

Ќе бараме инклузивност онаму кадешто е потребно, но не по секоја цена и не по цена на нарушување на посебностите во општественото живеење;

Ќе го предизвикуваме и критички ќе ги преиспитуваме позициите на секој политичко-општествен естаблишмент, особено оние недемократските или проблематично демократските, екстремно националистичките, популистичките, радикално левите или радикално десните, реакционерните, клерикалните, економските фундаметналисти итн.

Ќе се залагаме за суштински промени (а не само за “реформи заради реформи“) онаму кадешто се тие потребни и приоритетни. Според нас, не сите „реформи“ овозможуваат позитивни промени, освен ако не се темелно проценети и длабоко промислени.

Ќе промовираме регионален пристап во областите кои може да донесат кумулативен прогрес за сите држави од регионот. Познавањето и препознавањето на регионалните теми ќе биде еден од приоритетите на нашето делување.

Програма за општество / демократија

Програма за општество / демократија

Култура

Култура

Образование

Образование

Контекст

Во што веруваме?/ Нашето кредо

Нашата приказната се потпира на три поврзани столба:

Визија

Мисија/цели

Најдете нè на

Нашата приказната се потпира на
три поврзани столба: